एकै हप्ता अमेरिकामा २ नेपाली युवाको मृत्यु्

अमेरिका: एक हप्ताको अवधिमा अमेरिकामा २ नेपाली युवकको मृत्यु भएको छ।  जुलाई २७ का दिन  पर्वत जिल्ला घर भएका २८ वर्षीय विपिन लम्सालको उपचारको क्रममा न्यूयोर्कस्थित एल्महर्स्ट अस्पतालमा मृत्यु भएको छ।  
५ वर्ष अगाडी मात्र अमेरिका आएका लम्साल अमेरिकाको न्यूयोर्क स्थित ग्र्याण्ड एभिन्युमा बस्दै आएका थिए। 

अचानक स्वास्थ्यमा समस्या देखिएपछि मंगलबार उनलाई नजिकैको एल्महर्स्ट अस्पताल लगिएको थियो। उपचारको क्रममा उनको मृत्यु भएको गैर आवाशीय नेपाली संघ अमेरिकाको न्यूयोर्क शाखाका अध्यक्ष आङ्ग छिरिङ्ग शेर्पाले जानकारी दिए।

अमेरिकाकै अर्को राज्य विसकनसिनमा २२ वर्षीय नेपाली युवा सृजन कुँवरको गत जुलाई २८ तारिख बुधवार मृत्यु भएको छ। सृजन पसलमा काम गरिरहेको समयमा बेहोस भएका थिए।  काठमाडौँ दक्षिणकाली नेपाल घर भएका डीभी लोटरी विजेता सृजन कुँवर भने २०१९ देखि अमेरिका बस्दै आएका थिए।

दुवै युवाको शवलाई नेपाल पठाउन गैर आवासीय नेपाली सङ्घ अमेरिकाले सबै पक्षसँग समन्वय गरिरहेको गैर आवासीय नेपाली सङ्घ अमेरिकाका प्रवक्ता तोया दाहालद्वारा जारी विज्ञप्तिमा उल्लेख छ।