गौरीगंगा गोल्डकपमा स्टार सिटी ब्वाईज युनियन सेमिफाईनलमा
धनगढीः कैलालीको गौरीगंगामा भईरहेको चौथो संस्करणको गौरीगंगा गोल्डकप २०८० मा स्टार सिटी ब्वाईज युनियन सेमिफाईनलमा प्रवेश गरेको छ।
गौरीगंंगा ११ स्पोर्टस क्लबको आयोजनामा भईरहेको प्रतियोगिता अन्तगर्त आज (बुधवार) भएको खेलमा जित हात पार्दै स्टार सिटी ब्वाईज युनियन अन्तिम चारमा पुगेको हो। स्टार सिटी ब्वाईज युनियनले विएस १५ क्लबलाई २–० ले हराएको हो।
खेलमा कुवेर सिंहले उत्कृष्ट प्रदर्शन गर्दै टीमका लागि दुई गोल गरे। उनले पहिलो हाफको ३२ औं मिनेटमा पहिलो र दोस्रो हाफको ८७ औं मिनेटमा दोस्रो गोल गरे। उनी खेलको म्यान अफ द म्याच भए। उनले नगद पाँच हजार सहित ट्रफी पाए। यस्तै प्रतियोगिताको रोकिएको उद्घाटन खेलमा सुदूरपश्चिम ११ विजयी भएको छ।
मंगलवार साँझ पानी परेका कारण रोकिएको खेलको बाँकी समय खेलाईएको खेलमा सुप ११ ले घोडाघोडी युवा क्लबलाई १–० ले हरायो। सुप ११ का लागि दोस्रो हाफको ७२ औं मिनेटमा अमर डंगोलले निर्णायक गोल गरे। उनले खेलको म्याच अफ द म्याच हुँदै नगद पाँच हजार सहित ट्रफी पाए। प्रतियोगिता अन्तर्गत भोली आयोजक गौरीगंगा ११ स्पोर्टस क्लब र अछामको ब्याक एन्जल बीच खेल हुनेछ।
