डडेल्धुराको रिसोर्टमा युवती मृत फेलाः हत्याको आशंका, प्रहरी जवान नियन्त्रणमा

धनगढी : डडेल्धुराको कुकुलेकमा रहेको रातो गुँरास रिसोर्टमा मृत फेला परेकी युवतीको हत्या भएको आशंका गरिएको छ। जिल्लाको अमरगढी नगरपालिका –७ की अन्दाजी २०/२१ वर्षीया निर्मला बोहोरा बुधबार बिहान कोठाको बाथरुममा मृत अवस्थामा फेला परेकी थिइन। कपडा इस्त्री गर्ने आइरनको तारमा झुण्डिएको अवस्थामा उनको शव फेला परेको थियो। 

खाना खान बोलाउन जाँदा कोठाको बाथरुममा उनी(बोहरा) मृत अवस्थामा फेला परेपछि होटलले प्रहरीलाई जानकारी गराएको थियो। तर युवतीसँगै रहेका एक व्यक्ति मृतकको शव भेटिँदा कोठामा नपाइएकाले घटना रहस्यमय बनेको छ। 

एक स्रोतका अनुसार ती युवती मंगलबार साझ पोखराबजारबाट रिसोर्टतर्फ जान लागेकी थिइन। त्यस्तै प्रारम्भिक अनुसन्धानमा पनि युवती आफैले रिसोर्टमा गएर कोठा बुक गरेको भन्नेसम्म खुलेको प्रहरी स्रोतले बताएको छ। स्रोत भन्छ, ‘युवतीसँगै एक प्रहरी जवान समेत रहेको भन्ने खुलेको छ। त्यही आधारमा ती प्रहरी जवानलाई नियन्त्रणमा लिएर अनुसन्धान गर्दैछौ।’ ती प्रहरी जवान अजयमेरु गाउपालिका –२  चमडा चौकीमा कार्यरत रहेको स्रोतको दावी छ। 

यद्यपी जिल्ला प्रहरी कार्यालय डडेल्धुराका प्रहरी नायव उपरीक्षक दधिराम न्यौपानेले  बोहोरोको हत्या वा आत्महत्या हो भन्नेबारे अनुसन्धान जारी रहेको बताएका छन्। उनका अनुसार शवको शरिरमा बाहिरी चोट देखिएको छ र थप अनुसन्धानका लागि शवलाई पोष्टमार्टम गर्न डडेल्धुरा अस्पताल लगिएको छ। ‘घटना स्थलबाट मुचुल्का उठाएर ल्याइसकेका छौ, अब शव परिक्षणपछि मात्रै घटनाबारे रहस्य खुुल्ने छ’ डीएसपी न्यौपानेले भने, ‘हत्या रहेछ भने चाहे जो सुकै होस दोषिलाई कारबाही हुन्छ।’ उनले अहिलेसम्म कुनै किटानी जाहेरी दर्ता नभएको समेत जानकारी दिए। 

साथै प्रहरीले उक्त रिसोर्टमा सीसी टिभि क्यामेरा समेत रहेकाले त्यसको समेत अनुसन्धान भइरहेको र छिट्टै घटनाबारे सबै कुरा सार्वजनिक हुने जनाएको छ। 

लकडाउनका बेला रिसार्ट किन खुल्लै ?
अहिले विश्वव्यापी महाकारीका रुपमा फैलिएको कोरोना भाइरस नियन्त्रण तथा रोकथामका लागि सरकारले देशभर लकडाउन जारी गरेको छ। उक्त समयमा कुनै होटल नखोल्न भनेको छ। तर सरकारी आदेशको धज्जी उडाएर डडेल्धुराको रातो गुँरास रिसार्टले व्यवसाय गरिरहेको छ। सोही कारण उक्त घटना घटेको भन्दै स्थानीयले रोष पोखेका छन्। 

यतीसम्म की उक्त रिसोर्टमा दैनिकजसो जुवातास खेलिने गरेको समेत एक स्थानीयले बताए। ‘त्यहाँ सधैजसो भिडभाड हुन्थ्यो, यसरी बुझौ लकडाउनका बेला मोजमस्ती गर्ने स्थल बनेको थियो रातो गुँरास’ एक स्थानीयले भने।

डडेल्धुराको एक होटलमा युवती मृत फेला