बझाङको हात्तीसार दरबारको संरक्षण गर्न छलफल

बझाङः बझाङको हात्तीसार दरबारको संरक्षण पहल सुरु भएको छ। जिल्लाको सदरमुकाम चैनपुरमा रहेको ऐतिहासिक हात्तीसार दरबार संरक्षण गर्न बृहत् छलफल भएको हो।

जिल्ला विपद् व्यवस्थापन समितिको बैठकमा बिहिवार दरबारको मर्मत सम्भारको विषयमा कुरा उठेपछि शुक्रवार विभिन्न राजनीतिक दलका प्रतिनिधिहरू, नागरिक समाजका अगुवा र पत्रकारहरूको उपस्थिति उक्त छलफल गरिएको प्रमुख जिल्ला अधिकारी कैलाशबहादुर ठकुराठीले बताए।

बैठकमा हात्तीसार दरबारको मर्मतसम्भार र सुरक्षाको बारेमा छलफल भएको हो। बैठकमा जिल्ला समन्वय समिति प्रमुख नरबहादुर बोहराले हात्तीसार दरबार ऐतिहासिक भएकाले यसको संरक्षणका लागि केवल मर्मतसम्भारमात्र गर्नु पर्याप्त नभई यसलाई दीर्घकालीन सुरक्षित राख्न समग्र योजना बनाउन आवश्यक रहेको बताए। हात्तीसार दरबारलाई सामाजिक र सांस्कृतिक केन्द्रको रूपमा पुनः विकास गर्न व्यापक योजना बनाउन जरुरी रहेको नेपाली काँग्रेसका प्रवक्ता रमानन्द जोशीले बताए।

नेकपा एमालेका सचिव नयन बोहराले हात्तीसार दरबारको ऐतिहासिक महत्वलाई ध्यानमा राख्दै मर्मतसम्भार गर्नुपर्ने र यसलाई सुरक्षित राख्न जनशक्ति खटाउनुपर्ने बताए।

छलफलपछि बैठकले हात्तीसार दरबार संरक्षण गर्न डोटीमा रहेको सघन सहरी तथा भवन निर्माण आयोजना कार्यालयलाई साविकको बनावटमा असर नपर्ने गरी मर्मतसम्भार गर्न अनुरोध गर्ने निर्णय गरेको छ। बैठकमा सहभागीहरूले यस कार्यमा ऐतिहासिक संरचनाको मर्मत सम्भार र सुरक्षा सुनिश्चित गर्न स्थानीय सरकार, जनसहभागिता र विशेषज्ञहरूको समन्वयमा काम गर्नुपर्ने बताएका छन्।

बैठकमा जिल्ला समन्वय समिति प्रमुख बोहरासँगै उपप्रमुख कृष्णबहादुर विष्ट, प्रमुख जिल्ला अधिकारी ठकुराठी, नेपाली कांग्रेसका प्रवक्ता जोशी, नेकपा एमालेका सचिव बोहरा, रास्वपाका प्रतिनिधि प्रयागराज जोशी, राप्रपाका पूर्वअध्यक्ष विश्वप्रकाश जेठारा, नेकपा एसका सचिव लक्ष्मीराज जोशी, नागरिक समाजका अगुवा र पत्रकारहरूको सहभागिता रहेको थियो।

विसं १९४५ तिर निर्माण गरिएको उक्त दरबारमा जिल्ला प्रशासन कार्यालय रहँदै आएको थियो। २०६९ सालमा जिल्ला प्रशासन कार्यालय नयाँ भवनमा सरेपछि दरबार अलपत्र जस्तै बनेको थियो । ६ वर्षपछि मात्र दरबार संरक्षणको काम गरिएको हो।

बझाङी राजा जयपृथ्वीबहादुर सिंहले १९५१ सालतिर तराईबाट हात्तीको छावा ल्याएर राखेको हुनाले हात्तीसार दरबार नामकरण गरिएको हो। यस दरबारको निर्माणमा सालको काठ, ढुंगा र मासको गारो प्रयोग गरिएको राप्रपाका पूर्वजिल्ला अध्यक्ष विश्वप्रकाश जेठाराले बताए । दरबार हाल संरक्षण अभावमा जीर्ण छ।