नविल बैंकको टीकापुर शाखाद्वारा मुक्त कमैया आधारभूत विद्यालयमा न्यानो लुगा वितरण
धनगढीः नविल बैंकको टीकापुर शाखाले मुक्त कमैया आधारभूत विद्यालयमा न्यानो लुगा वितरण गरेको छ।
बैंकको टीकापुर शाखाले आफ्नो सामाजिक उत्तरदायित्व अन्तर्गत टीकापुर नगरपालिका–२ मा रहेको श्री मुक्त कमैया आधारभूत विद्यालयमा न्यानो लुगा वितरण गरेको हो। कार्यक्रम विद्यालयका विद्यार्थीहरूलाई चिसो मौसममा राहत प्रदान गर्ने उद्देश्यले आयोजना गरिएको बताइएको छ। न्यानो लुगाको वितरणले विद्यार्थीहरूलाई जाडो मौसममा सहजताका साथ पठनपाठन गर्न प्रेरणा मिल्ने अपेक्षा गरिएको छ।
कार्यक्रममा नविल बैंक टिकापुर शाखाका शाखा प्रमुख जनकराज ओझाले बैंकको सामाजिक सेवा र उत्तरदायित्वबारे प्रकाश पार्दै समुदायप्रति निरन्तर सहयोग गर्ने प्रतिबद्धता व्यक्त गरे। त्यसैगरी, विद्यालयका अध्यक्ष सोलारी चौधरी र विद्यालयका प्रधानाध्यापक राजाराम ढकालले नविल बैंकलाई धन्यवाद दिँदै यस प्रकारको सहयोगले विद्यार्थीहरूको जीवनस्तर सुधार्न महत्त्वपूर्ण भूमिका खेल्ने बताए।
उक्त कार्यक्रममा विद्यालयका शिक्षक, विद्यार्थी र अभिभावकहरूको उपस्थिति रहेको थियो। यस किसिमका समाजसेवी कार्यहरूले बैंक र समुदायबीचको सम्बन्धलाई अझ प्रगाढ बनाउने विश्वास गरिएको छ।
