कैलाली र कञ्चनपुरबाट लागुऔषधसहित चार जना युवक पक्राउ

धनगढीः कैलाली र कञ्चनपुरबाट लागुऔषधसहित चार जना युवक पक्राउ परेका छन्। कञ्चनपुरबाट तीन र कैलालीबाट एक युवक लागुऔषधसहित पक्राउ परेका हुन्।

कञ्चनपुरको भीमदत्त नगरपालिका–६ ऐठपुरस्थित त्रिवेणी चोकबाट ३८० मिलिग्राम लागुऔषधसहित २ जना आइतबार साँझ पक्राउ परेका छन्। भीमदत्त नगरपालिका–६ ऐठपुरका २३ वर्षीय राहुल डगौरा र २५ वर्षीय सञ्जु डगौरा लागुऔषधसहित पक्राउ परेका छन्। जिल्ला प्रहरी कार्यालय कञ्चनपुर र लागूऔषध नियन्त्रण ब्यूरो शाखा कार्यालयबाट खटिएको प्रहरीले दुबै जनालाई लागुऔषधसहित नियन्त्रणमा लिएको हो।

यसैगरी भीमदत्त नगरपालिका–३ भाँसीबाट १४० मिलिग्राम लागुऔषधसहित सोही स्थानका ३० वर्षीय टेकराज जोशीलाई आइतबार दिउँसो प्रहरीले पक्राउ गरेको छ। जिल्ला प्रहरी कार्यालय कञ्चनपुर र लागूऔषध नियन्त्रण ब्यूरो शाखा कार्यालयबाट खटिएको प्रहरीले उनलाई लागुऔषधसहित पक्राउ गरेको हो।

यता कैलालीको टीकापुर नगरपालिका–९ खक्रोला पुल नजिकबाट पनि लागुऔषधसहित थप एक जनालाई पक्राउ गरिएको छ। १ ग्राम ९४० मिलिग्राम लागुऔषधसहित टीकापुर नगरपालिका–६ नारायणपुरका २० वर्षीय बिशाल चौधरीलाई आइतबार साँझ प्रहरीले पक्राउ गरेको हो। प्रहरी चौकी कालाकुण्डाबाट खटिएको प्रहरीले भारतबाट नेपालतर्फ आउँदै गरेका उनलाई लागुऔषधसहित नियन्त्रणमा लिएको हो।