रुसका सेना प्रमुख र पूर्वमन्त्रीविरुद्ध आइसिसीद्वारा पक्राउ पुर्जी जारी
एजेन्सीः अन्तर्राष्ट्रिय फौजदारी अदालत (आइसिसी) ले रुसका जनरल स्टाफ प्रमुख भ्यालेरी गेरासिमोभ र पूर्वरक्षामन्त्री सर्गेई शोइगुविरुद्ध पक्राउ पुर्जी जारी गरेको मङ्गलवार बताएको छ।
नागरिक वस्तुहरूमा आक्रमण गर्ने र नागरिकहरूलाई अत्यधिक आकस्मिक हानि पुर्याउने कथित युद्ध अपराधका साथै युक्रेनमा ‘अमानवीय कार्यहरू’ को मानवताविरुद्धको अपराधका लागि पक्राउ पुर्जी जारी गरिएको आइसिसीले एक विज्ञप्तिमा जनाएको छ।
’कम्तीमा सन् २०२२ अक्टोबर १० देखि सन् २०२३ मार्च ९ सम्म युक्रेनी विद्युतीय पूर्वाधारविरुद्ध रुसी सशस्त्र सेनाहरूले गरेको मिसाइल हमलाको जिम्मेवारी दुई संदिग्ध व्यक्तिले वहन गर्ने उचित आधारहरू छन्’, आइसिसी न्यायाधीशहरूले भनेका छन्।
अदालतले गत वर्षको मार्चमा रुसी राष्ट्रपति भ्लादिमिर पुटिनका लागि पक्राउ पुर्जी जारी गरेको थियो। उक्त फैसलालाई मस्कोले ‘अमान्य’ भनेको थियो। जवाफमा रुसले आइसिसीका अध्यक्षविरुद्ध आफ्नै पक्राउ पुर्जी जारी गरेको थियो।
