एनभीए भलिबलः महिलातर्फ उपाधिका लागि एभरेस्ट र पुलिस क्लब खेल्ने
काठमाडौँः आठौँ प्रधानमन्त्री कप एनभीए भलिबल लिगको महिलातर्फ फाइनल खेलमा एभरेस्ट क्लब र नेपाल पुलिस क्लब खेल्ने भएका छन्।
त्रिपुरेश्वरमा रहेको राष्ट्रिय खेलकुद परिषद् (राखेप) को कभर्ड हलमा आज भएको खेलमा पुलिसलाई ३–१ को सेटमा हराउँदै एभरेस्ट अपराजित रहँदै उपाधि नजिकै पुगेको हो। पुलिस लगातार चार खेल जित्दै यसअघि नै फाइनलमा पुगिसकेको थियो। महिलातर्फको फाइनल खेल भोलि दिउँसो १ बजे हुनेछ।
प्रतियोगिताको पुरुषतर्फ लिग चरणको अन्तिम खेल चलिरहेको छ। यो खेलपछि फाइनल पुग्ने टोलीको टुङ्गो लाग्नेछ। पुरुषतर्फ फाइनल खेल पनि भोलि दिउँसो ३ बजे हुनेछ। यस्तै तेस्रो स्थानका लागि पनि भोलि नै खेल हुनेछ। प्रतियोगितामा पुरुषतर्फ आठ र महिलातर्फ छ वटा टोली सहभागी थिए। पुरुष र महिला दुवैतर्फको विजेताले आठ लाख, उपविजेताले चार लाख र तेस्रो हुने टोलीले दुई लाख रुपैयाँ पाउनेछन्।
