यू–१९ सुदूरपश्चिम छनौटमा बैतडीको दोस्रो जित

धनगढीः कप्तान नरेन भट्टको शतकमा बैतडीले वाई वाई यू १९  एकदिवसीय राष्ट्रिय क्रिकेट प्रतियोगिताको सुदूरपश्चिम छनौटमा लगातार दोस्रो जित दर्ता गरेको छ।

दोस्रो जित दर्ता गर्ने क्रममा आज  बैतडीले डोटीलाई ६ विकेटले पराजित गर्‍यो। जितका लागि पाएको १६१ रनको लक्ष्य बैतडीले २४.२ ओभरमा ४ विकेटको क्षतिमा पुरा गर्‍यो। जसमा कप्तान नरेनले १११ रनको अविजित शतकीय पारी खेले।

नरेन जारी प्रतियोगितामा शतक प्रहार गर्ने पहिलो खेलाडी हुन्।  अन्य ब्याटरले सम्झनलायक प्रदर्शन गर्न सकेनन्। डोटीका  आयुश द्वारिया,प्रकाशराज जोशी,सौर्य श्रेष्ठ र आयुश खड्काले समान १÷१ विकेट हात पारे।

त्यसअघि परशुराम नगरपालिका १२ स्थित  जोगबुढा रंग मैदानमा टस जितेर पहिला ब्याटिङ गरेको डोटी ३८.३ ओभरमा १६० रनमा अलआउट भयो। उसका योगेश सुतारले ४४ र आयुश द्वारियाले ४३ रन बनाए। बैतडीका सचिन भट्ट र कल्पेश चन्दले समान ३ र आकाश चन्दले २ विकेट झारे।

बैतडीका कप्तान नरेन  भट्ट खेलका म्यान अफ द म्याच बने। यसअघि बैतडीले पहिलो खेलमा  दार्चुलामाथि २०९ रनको विशाल जित निकालेको थियो।