बैतडीमा उठेका ‘बा’ को भारतबाट प्रचार गर्दै बलिउड अभिनेत्री भट्ट
धनगढीः बलिउड अभिनेत्री साध्वी भट्टले आफ्ना बुवाको प्रचारप्रसारमा खटिएकी छन्। ‘दि ड्रिम जब’ मार्फत् बलिउड फिल्म क्षेत्रमा ‘डेब्यु’ गरेकी भट्टले बुवाका लागि भोट अपिल गरिरहेकी हुन्।
उनको घर बैतडीको देहिमाण्डौं हो। उनका बुवा शिवराज भट्ट बैतडीको प्रदेशसभा (२) मा कांग्रेसका तर्फबाट उम्मेदवार छन्। साध्वी उनैकी छोरी हुन्। उनले सामाजिक सञ्जालमा आफ्ना बुवाको प्रचार सामाग्री पोष्ट गर्दै भोट मागेकी छन्।साध्वीले २०३६ देखि निरन्तर राजनीतिक परिवर्तन, सामाजिक, आर्थिक, शैक्षिक र समग्र विकासका लागि जनताको जनजीविका र राष्ट्रको स्वाधीनताका लागि संघर्ष गरिरहेको राजनीतिकर्मीका रुपमा आफ्ना बुवा शिवराज भट्टलाई अथ्र्याएकी छन्।
भट्टका जेठा छोरा नेपालमै, छोरी साध्वी र कान्छा छोरा मुम्बईमा बस्दै आएका छन्। उनले पछिल्लो समय आफ्ना बुवाको चुनावी प्रचारका लागि गतिविधिहरु बढाएकी छन्। साध्वीको ‘दि ड्रिम जब’ मा जुबेर कमल खान, दुर्गेश कुमार, विकास श्रीवास्तव, खुश्बु उपाध्याय, प्रसाद शिकरेलगायतका कलाकारले अभिनय गरेका छन्।
उनी बलिउड फिल्म ‘बेसरम’ मा अभिनेता रणवीर कपुरसँग नृत्यमा देखिएकी थिइन्। साध्वी मुम्बईमा अभिनेता अनुपम खेरको इन्स्टिच्यूटबाट अभिनयमा डिप्लोमा गरेपछि बलिउड फिल्म उद्योगतिर लागेकी हुन्। जावेद अख्तर र ललित पण्डितको संगीतमा आधा दर्जन गीत गाएकी उनले दर्जनौं म्युजिक भिडिओ र सर्ट फिल्महरूमा पनि काम गरिसकेकी छन्।
