कोरोना महामारीपछि सुदूरपश्चिम फर्किएका युवाहरू पुनः तेस्रो मुलुक पलायन हुँदै

धगनढीः कोरोना महामारीपछि स्वदेश फर्किएका युवाहरू सुदूरपश्चिममा अवसर नपाएको भन्दै फेरि तेस्रो मुलुक पलायन हुन थालेका छन्।

स्वदेशमै कुनै व्यवसाय गर्ने मनसाय बनाएका उनीहरू गतिलो अवसर नभेट्टाएको भन्दै फेरि विदेशिन थालेपछि पुनः श्रम स्वीकृति लिनेहरुको संख्यामा समेत वृद्धि भएको छ।

श्रम तथा रोजगार कार्यालय धनगढीका अनुसार कोरोनाका कारण पछिल्लो समय केही सुस्ताएपनि अहिले पुनः श्रम स्वीकृति लिनेहरूको संख्या उकालो लागेको हो।

कोरोना भाइरसको महामारीपछि दुवईबाट फर्किएका धनगढीका अनिलसिंह खत्री विदेश जान बिहिबार श्रम तथा रोजगार कार्यालयमा पुनः श्रम स्वीकृतिका लागि पुगेका थिए। स्वदेशी माटोमै केही गर्न सोच बनाएर स्वदेश फर्किएका उनी रोजगारीको अवसर नपाएपछि फेरि विदेशिन बाध्य भएका हुन्।

"स्वदेशमै केही गर्छु भनेर दुवईबाट फर्किएको थिँए।" उनले भने, "नेपालमा रोजगारीको अवसरनै छैन। परिवारको लागि पनि फेरि विदेशिनु परेको छ।" सरकारले रोजगारीका अवसरहरू श्रृजना गर्न नसक्दा युवाहरू नचाँहदा-नचाहँदै विदेश पलायन हुनुपर्ने बाध्यता रहेको उनको दुखेसो छ।

श्रम तथा रोजगार कार्यालय धनगढीमा खत्री जस्तै रोजगारीका लागि विगतमा तेस्रो मुलुकबाट फर्किएकाहरु पुनः श्रम स्वीकृति लिनका लागि पुग्ने गरेका छन्।

वैदेशिक रोजगार विभागले विराटनगर, जनकपुर, पोखरा, बुटवल, सुर्खेत र धनगढीका साथै काठमाडौँको ताहचलबाट श्रम स्वीकृति प्रदान गर्दै आएको थियो। सेवा प्रवाहलाई प्रविधिमैत्री बनाउँदै विभागले पुस १७ गतेदेखि अनलाइनबाटै पुनः श्रम स्वीकृति लिन सकिने व्यवस्था गरेको छ।

श्रम तथा रोजगार कार्यालय धनगढीको तथ्याङ्कअनुसार चालु वर्षको साउनदेखि पुससम्म सुदूरपश्चिमका ९ वटै जिल्ला र बाँके बर्दिया समेत गरि ३ सय ६४ पुरूष र ९ महिला गरि ३ सय ७३ जनाले तेस्रो मुलक जानको लागि पुनः श्रम स्वीकृति लिएका छन्। कार्यालयबाट २०७५ सालमा दुवई, मलेसिया, साउदी अरब, कुवेत, कतार, ओमान, बहराइन र जापानलगायतका मुलुकका लागि ७ सय २१ पुरूष र ८ महिला गरि ७ सय २९ जना र  २०७६ मा ३ हजार २ सय ७५ पुरूष र ५४ महिला गरि ३ हजार ३ सय २९ जनाले श्रम स्वीकृति लिएका छन्।

श्रम तथा रोजगार कार्यालय धनगढी कैलालीका सूचना अधिकारी जयदेव बिष्टले यस वर्ष कोरोना कहरका कारण असारदेखि पुनः श्रम स्वीकृति लिन सुरू गरिएको बताए।

" यस वर्षको भदौ-असोज तिर मासिक १५ देखि २० जनाले पुनः श्रम स्वीकृति लिएका थिए।" उनले भने, मंसिर-पुस महिनामा त्यो संख्या बढेर मासिक १ सय पुगेको छ।"

गत पुष १७ गतेदेखि सरकारले अनलाइन प्रणाली मार्फत पनि पुनः श्रम स्वीकृती लिन सक्ने व्यवस्था गरेपछि भौतिक रुपमा धनगढीस्थित कार्यालयमै पुगेर स्वीकृती लिनेको संख्या तुलनात्मक रुपमा कम देखिएतापनि विगतमा भन्दा बढेकै श्रम तथा रोजगार कार्यालयले  जनाएको छ।